政情：肥彭「回魂」 對港指手畫腳
末代港督彭定康（肥彭）再次就香港事務指指點點，包括最近於政圈議論紛紛嘅港獨、宣誓風波等。對於近年港獨思潮崛起，肥彭話將港獨同爭取民主混為一談係不智同不誠實，又形容港獨根本無可能發生，亦影響港人對民主嘅支持。
肆評港獨宣誓風波
正喺香港嘅肥彭尋日中午於外國記者協會出席午餐會並發表演說，談及美國總統當選人特朗普及英國脫歐後嘅世界情況，之後佢又回應涉及香港嘅多項議題，包括青年新政游蕙禎及梁頌恆嘅宣誓風波，肥彭都加把口講埋一份。
肥彭聲稱，宣誓係嚴肅嘅事情，唔應該同言論自由等問題混淆，佢其後又列舉北愛爾蘭共和軍組成嘅新芬黨為例子，指該黨因拒絕宣誓效忠英女王，最終唔能夠取得國會議席。游梁如果聽到肥彭呢個講法，唔知會否覺得心中不是味兒呢？