政情：自由「人」入行會 擺明去田少化
自由黨榮譽主席田北俊（田少）一向打着「ABC」（Anyone but CY）反對特首梁振英連任嘅旗幟，令人聯想該黨亦有同一立場，然而自從上月該黨改選領導層，由原任黨主席嘅紡織及製衣界議員鍾國斌出任黨魁，飲食界議員張宇人（Tommy）接任黨主席，Tommy當時表明「ABC」非黨立場，擺明同田少劃清界線。言猶在耳，Tommy尋日仲接受CY委任成為行政會議非官守成員，佢透露有同該黨另外三名議員溝通並獲得支持，加上田少自爆事前未獲通知，明眼人都睇得出此舉猶如將田少踢出核心以外，該黨去田少化嘅路線愈做愈明顯。
否認屬政治酬庸
現年六十七歲嘅Tommy獲委任為行會成員，對於自由黨來講係別具意義，事關今次係CY上任特首四年多以來，首次委任該黨成員加入行會，而翻查資料顯示，該黨上次有成員加入行會，已經係八年前嘅立法會前議員周梁淑怡。話雖如此，十多年前曾任行會成員嘅田少似乎對Tommy加入行會有好大意見，直指Tommy接受任命唔係明智做法，要求對方辭任黨主席職務。
Tommy於政府公布有關任命後約一小時會見傳媒，期間被多次問及會否退黨、田少「ABC」主張等問題，Tommy明確表示，田少同CY之間嘅爭拗屬於個人問題，唔應該拉埋自由黨嚟講，並稱「田北俊講過咩，你問番田北俊」，自己冇考慮退黨。佢其後更指，「ABC」係部分黨員個人意見，「自由黨同我，從來都係對事唔對人」，似乎想在陽光下把去田少化嘅訊息表達得清清楚楚。
被問及現屆政府只餘下七個月才獲委任加入行會，會否為CY連任鋪路，Tommy話有關情況唔存在，自己未聽過對方提及連任及參選特首嘅事，亦唔認為今次委任屬於政治酬庸。
廖長江亦獲委任
除咗Tommy，身為建制派「班長」嘅商界議員廖長江亦獲委任為行會非官守成員，加上廖嘅胞兄廖長城係現任行會非官守成員，換言之廖氏兄弟將同時進入港府決策核心。廖長江對於獲委任為行會成員表示榮幸，但強調今次委任與其出任建制派召集人冇關，亦不存在任何附帶條件。