中環出更：絕招防洩密 「亮」出電話簿
唔少人都有安裝攔截不明來電嘅手機App（應用程式），不過有關程式嘅「號碼反查」功能被指會下載用戶嘅通訊錄，引發私隱危機。卓妮早前見到唔少城中名人，大家都唔係咁擔心，其中立法會前議員吳亮星有絕招，就係用最傳統嘅電話簿喇！星爺話冇安裝上述App，仲即刻喺西裝暗袋拎出本電話簿，形容本簿緊要過銀包喎！
馬會大董梁高美懿亦冇安裝呢類App，佢話自從智能電話盛行之後，私隱風險大咗，幾乎可以話係避無可避。平日佢見到不明來電就會選擇唔聽，亦唔怕錯過重要電話，事關如果對方真係有事搵佢，自然會識得留言喇！
梁海明笑稱唔會贖番Ann
立法會議員蔣麗芸（Ann）就話，自己有兩部電話，一部工作用，只裝小量最基本嘅App，另一部就私人用。佢用電話都幾小心，試過喺安裝一個拼貼相片嘅App時，個App唔止要佢授權使用相簿資料，仲指明要索取聯絡人資料，佢覺得唔合理，超出咗個App本身嘅用途，所以最後索性唔裝。
講起詐騙電話屢禁不止，Ann嘅老公梁海明就自爆，曾經差啲墮入「狀元攤」騙局。話說有個唔熟嘅人打嚟叫佢上去公司傾生意，上到去對方就拎咗一篋錢出嚟，搵佢合謀扮輸錢畀佢個姪，梁海明梗係即刻拒絕，後來發現原來又係騙案手法之一，好彩冇上當。話時話，如果有人打嚟話Ann畀人捉咗點算？梁海明就笑笑口話唔驚，因為佢唔會去贖番老婆喎！
卓妮