兵熊熊一個，將熊熊一窩。一個政府係咪有為，唔係自己吹嘅，睇實戰成績咪知囉。嗱，最新嘅審計報告踢爆最少十個部門嘅種種混帳，延誤有之，疏漏有之，大花筒又有之，呢個政府到底係龍定係蟲，大家心照喇。
今次被審計報告照肺嘅部門之多，破晒紀錄，包括消防處、食環署、環保署、醫管局、房屋署、康文署、教資會等等，簡直沒有最醜，只有更醜。尤其係消防處，涉及十八宗罪咁多，唔好話絕後，肯定係空前，淨係曾被本報踢爆揸流攤嘅第三代調派系統咋，啟用首兩年嘅緊急召喚服務達標率遠低於服務承諾，原來同該系統未驗收先上馬有關。消防處求其成咁，出事有乜稀奇吖，冇爆大鑊係好彩咋。
不過講到最敗家咯喎，就梗係採購消防車及消防船出現延誤，浪費九千多萬元公帑喇。話說消防處曾獲撥款採購三十七架消防車，同承辦商簽好合約並支付六千多萬元後，合約突然被政府取消，呢筆錢就一去冇回頭，仲搞到新消防車最終要延遲四年先至啟用。至於更換滅火輪同埋快艇一樣甩甩漏漏，由於採購進度緩慢，家陣都未能交付，期間嘅延誤開支及舊船保養維修費節節上升唔在講，最大鑊係隨時影響救援質素，你話消防處該當何罪吖？近年消防災難頻生，可以話禍根早種。
當然啦，消防處嘅衰嘢只係冰山一角咋，好似「審計之友」嘅食環署咁吖，今次又榜上有名喇，被踢爆處理樓宇滲水問題效率低下，唔止搵出滲水源頭成功率大跌，更有三成四個案未能於規定時間內完成調查，當中有個案調查八年都冇下文，根本就係食塞米。至於理應係象牙塔嘅大學資助委員會一樣烏煙瘴氣，單係開會支出咋，十年間暴升逾三倍，使錢好似倒水咁，到底佢哋係開會定開Ｐ呢？
仲有呀，醫管局被批管理藥物粗疏，康文署被斥拓展觀眾群不力，環保署對化糞池服務公司冇規冇管……算喇，再數落去，怕且數到天光都數唔晒，都係慳番啖氣好過。正所謂有比較知高下，家陣好多人懷念港英時代，唔係冇道理(口架)，大家幾時見過港英政府做事有咁多甩漏吖？超支有咁離譜吖？官員錯完再錯都唔使負責任吖？好似審計報告一年發表幾次，政府部門次次都係意見接受態度照舊，話口未完又重犯，吹脹！唔怪得有人話審計報告係冇牙老虎喇。
大家睇到嘞，上樑不正下樑歪，政府部門亂象叢生，講到尾都係港府冇神經冇靈魂，直頭殭屍咁。所以話啫，繼續畀呢班庸官尸位素餐，香港遲早玩完，不如退位讓賢，畀番個希望大家喇。