香港搞港獨及其本土自決之輩，多是如被玻璃罩網住嘅烏蠅，看到光明卻找不到出路！「及其」再橫飛亂撞，嗡嗡幾聲，最終也就嗚呼哀哉！兩隻失落議席嘅小學雞，固然玩火自焚，自己找死怨不得人還要死命頑抗，又話要「眾籌」五百萬打官司，兩隻小學雞已經誠信盡失，「青年新政」亦一鋪清袋，「頭仲痕」睇怕連籌買酒消愁嘅銀両亦不易，何況大拿拿五百萬元？至於搞到黃衞兵為之失眠嘅「港獨女神」，也不分青紅皂白去信英國政府，冀英國關注其被褫奪議員事件；兩隻小學雞盲頭烏蠅兩隻，憑乜叫人關注？
小學雞一方面強調中央不應干預香港立法機關，話咁有違《中英聯合聲明》，一方面自己又去乞求「外援」，這不是尋求外國勢力干預本港立法及其司法機關嗎？如此帶住矛盾去「哭秦庭」，除了自暴其短，老朽睇到你哋唔係「本土自決」而係「本土自絕」，若然有兩分羞恥之心應該唔好再出來獻醜。
英美兩國今非昔比，前者脫歐已自絕於西方陣營，為了刺激經濟更有必要討好中國，講到底，點會為了兩隻小學雞得罪最愛大派禮物嘅好客中國？至於美國，狂人特朗普當選後百廢待舉，淨係平息要佢下台嘅怒火都有排搞，點會得閒理鬼你啲冇厘頭「播獨」事件。真要追究嘅，係你哋搞埋咁多佔領運動、民主自決，又去勾結外國勢力，搞到香港雞犬不寧，市場波動，令香港營商環境變得不穩定，害嘅其實係本土！如今仲斗膽乞援，理應各打五十大板！日前在秘魯利馬出席APEC的國家主席習近平，同梁振英會面時已講到明「一國兩制下港獨沒有空間」，一班小學雞若然不自量力，除了失敗搗亂，再失敗再搗亂直至滅亡，老朽真係睇唔到被罩在玻璃瓶內嘅烏蠅有何通天本領可以突圍。問題係佢哋置大部分港人利益於不顧，如此低政治智商，唔該滾出香港，勿累人累物。