政情：今日你上鏡：蔣麗芸加細外套離奇爆線

天氣轉涼，秋冬季靚衫又可以派上用場。立法會議員蔣麗芸（Ann）尋日就着咗一件褐色短裝外套返立法會開會，幾有時尚感。不過阿Ann就畀人發現佢件外套背部「驚現」一條白色線痕，原來係爆線。阿Ann知悉後都感到莫名其妙，仲話「件衫又唔係窄，都唔知點解會爆咗。」雖然Ann就話唔覺件外套窄咗，但原來佢呢件外套係「XS」加細碼嘅。事緣阿Ann被問到爆線嘅外套係咪名牌，會唔會好貴時，佢就話自己都唔記得，因為每件衫買返嚟後都會將衫領位嘅牌子剪走，以防「拮肉」，Ann仲一路講一路反開衫領展示，結果Ann就自行「露底」，暴露咗自己原來係着加細碼喇！