政情：梁頌恆選舉開支用剩捐款
被取消立法會議員資格嘅青年新政梁頌恆，佢申報嘅選舉開支近五十五萬元，比本土民主前線（本民前）嘅梁天琦參加新界東補選時嘅七十五萬元還少，而佢獲得嘅捐贈近五十六萬元，換言之，佢所獲嘅捐贈仲用剩逾萬元。
梁天琦被取消參選資格後，轉由「Plan B」梁頌恆出選並成功當選。梁頌恆名單嘅選舉總開支為五十四萬七千元，選舉廣告用咗接近二十八萬元，另一項嘅主要開支，係僱用本民前旗下嘅網台做個人形象、宣傳品設計同統籌，費用為八萬五千元。
佢又申報獲得合共五十三萬二千元小額（一千元或以下）捐款，另獲六人捐出二萬五千元。由於佢獲得嘅捐款多於選舉開支一萬多元，需按法例將未使用嘅選舉捐款捐贈，可以捐畀公共慈善機構或慈善信託，但佢喺申報中，未有披露將相關款項捐畀邊間機構。
阿涂阿忠嘔凸200萬
另外，參選俗稱「超區」嘅區議會（第二）功能界別嘅候選人當中，民主黨（白鴿黨）涂謹申（阿涂）嘅選舉開支四百幾萬元，即使扣除收到百幾萬元分別來自白鴿黨、雷曼苦主大聯盟同其他人士嘅選舉捐贈之後，佢都仲要自貼兩百幾萬元。由新界西轉戰選超區嘅街工梁耀忠都使咗二百萬元，主要都係用來支付助理薪金、津貼等，前後用咗大約一百萬，廣告開支就只係用咗七十幾萬，但因為阿忠喺成場選舉中一毫子選舉捐贈都冇收過，變相要自貼二百萬元。