中環出更：搞事四人幫聚餐感謝「金主」？

適逢今日為感恩節，傳統上家家戶戶都會聚首一堂，坐埋一齊食大餐。「搞事四人幫」亦都唔例外，尋晚齊齊整整去到壹傳媒黎智英（漢奸黎）位於何文田嘅寓所。今次除咗「搞事四人幫」嘅民主黨（白鴿黨）創黨主席李柱銘（李漢奸）、「民主阿婆」前政務司司長陳方安生、同埋天主教香港教區前主教陳日君外，仲有神父劉勝義、同埋稀客公民黨（公文袋）主席梁家傑（袋巾傑）。咁多人走埋一齊，唔通佢哋又想攪局？抑或係提早一日感謝「金主」呢？

李柱銘夫婦（中及右）接載梁家傑（左）到達漢奸黎寓所。（蔡高華攝）

眾所周知，近期反漢奸黎嘅怒潮一浪接一浪，幾乎日日都有市民去佢寓所外示威，而尋日朝早大約十一點，有約二十二名聲稱自發嘅市民揮動五星旗、拉起印有「政治黑金操縱選舉禍港害民滾出香港」同埋「廿三立法　刻不容緩」等標語嘅橫額，遊行到漢奸黎嘅寓所外抗議。佢哋高叫口號，又怒斥漢奸黎禍港，仲即場棒打及腳踢貼上「金主」同埋漢奸黎頭像嘅吹氣公仔洩憤。佢哋逗留咗大約一個鐘後離開，喺下午大約兩點鐘又折返，呢次就逗留咗大約廿五分鐘後和平散去。