以前過咗羅湖關，成班蓬頭垢面嘅乞丐湧埋嚟，當中唔少仲係殘疾人士。家陣羅湖關起咗地鐵，乞丐當堂唔見晒，究竟佢哋去咗邊呢？仲使問嘅，人哋丐幫大軍一早長驅直入攻陷香港，家陣更四處游走，遲早佔領全港十八區添呀。
話說內地丐幫集團盤據旺角搵食多時，搞到附近街坊怨聲載道，警方喺當區區議會施壓下加強掃蕩，近月大批殘丐轉移陣地，專攻灣仔商業區、紅磡及上水民居。呢啲殘丐行乞有晒隊形，部分賣藝嘅盲人由手執膠桶嘅視力正常人士帶領隨行，部分「領航員」更懷疑扮跛博同情，另外亦有「斷腳男」寫大字、「半身歌女」以及雙腳萎縮嘅賣唱姊妹花，簡直係五花八門。本報記者去睇過，唔少市民慷慨解囊，殘丐短短半日就賺超過五百大元，幾和味o架。
即係咁，香港人出名愛心爆棚，見到啲殘障人士咁可憐，出手相助係人之常情，但好多人唔知嘅係，殘丐背後由不法集團操控，甚至有人被監生打跛充當搖錢樹，畀錢佢哋等於變相資助惡勢力，分分鐘好心做壞事。咁都唔止吖，殘丐日頭聯群結隊搵食，收咗工返大本營，十幾人逼埋一個單位，加上生活習慣等問題，搞到成個地方烏煙瘴氣，居民真係多得佢哋唔少。
有立法會議員就講得啱嘞，行乞係犯法行為，當局好應該加強執法，最低限度都要將相關人士列入黑名單，禁止來港搵食，以免影響旅客對本港嘅印象。可惜事實啱啱相反，警方好似四方木咁，唔踢唔郁，好多時要靠市民自行「放蛇」搜集證據先至被動執法。查實警方只要好似記者咁全程跟蹤，順藤摸瓜，要直搗黃龍應該唔難，爭在有冇心做嘢嘅啫。
話時話，丐幫大舉襲港，絕對唔止擾民咁簡單。當大家見到丐幫嚟自內地，拐子幫、斬樹黨嚟自內地，連電騙集團都係嚟自內地，聽埋聽埋咁多負面新聞，自然唔會有咩好印象，兩地矛盾同摩擦就係因為咁愈演愈烈。領導人當年對外國人講過，中國一不輸出革命，二不輸出飢餓同貧困，三不折騰你們。家陣反而對香港輸出乞丐，輸出社會問題，折騰港人，點都講唔過去啫，係咪？
點都好喇，解鈴還需繫鈴人。唔理係電騙集團，抑或係乞丐集團，始終都要靠內地當局加強執法，堵塞漏洞。特別係「丐幫弟子」，講到尾都係因為內地福利、就業支援制度跟唔上，走投無路下至淪落到喺街頭行乞嘅啫。成日講「中國夢」、「民族復興」，連社會上最弱勢無依嘅一群都照顧唔好，咪盞笑大人個口！