政情：公民講場：游梁紅牌離場 謝偉俊「快開罰球」突襲

足球有所謂「快開罰球」嘅戰術，即係趁對方球員未準備好就開出罰球，博對方失誤而取得入球。估唔到平時唔睇波嘅立法會議員謝偉俊（Paul）都識得呢個戰術，趁依家青年新政游蕙禎同梁頌恆被「趕出場」，建制派喺直選議席只係比非建制派少一席嘅時機下，建議修改議事規則，博吓突襲成功。雖然阿Paul話改議規只係想引入罰款懲罰行為不檢嘅議員，但非建制派肯定會屯重兵鎮守呢個「禁區」，非建制派嘅直選議員真係一個都不能少，睇嚟阿Paul呢個罰球要射入龍門都唔係咁容易。