政情：梁君彥冇煩躁 囝囝讚EQ高
自從梁君彥出任立法會主席後發生唔少風波，外間對於佢點處理各種紛爭非常關注，亦少不免成為被批評對象之一。尋日喺一個活動中見到佢個仔梁宏正，佢就話覺得爸爸EQ好高，面對近日咁多問題，但返到屋企一啲都冇煩躁或脾氣。
對子嚴厲對孫慈祥
梁宏正尋日下晝出席菁英會「2016精英論壇」記者會時，講起爸爸梁君彥做咗立法會主席之後發生咗唔少事，好似宣誓風波咁，又被批評唔夠強硬等等，對此梁宏正話爸爸一上任就遇到咁嘅事，換轉係上任一年後先發生可能情況又唔同。
講到私底下，佢就話爸爸係個嚴父，細個嘅時候對佢嘅要求好高，但對個孫就好寬鬆，仲笑言有時佢自己叫個小朋友唔好做嘅嘢，轉頭爸爸趁佢行開就會縱個孫喎。
菁英會主席盧金榮亦在場，佢話嚟緊十一月三十日嘅菁英論壇邀請到十五位社會知名人士擔任講者，包括香港黃金五十創辦人林奮強同廠商會永遠名譽會長黃友嘉等，並以「如何推動社會創新 帶動一帶一路及香港未來發展」為主題，分為三個分論壇「經濟」、「青年」及「文化及體育」進行。