政情：謝正楓退黨欠上繳 走白鴿黨數
西貢區議員謝正楓早前宣布退出民主黨（白鴿黨），點知事件餘波未了。據了解，謝正楓以白鴿黨名義當選區議員之後，一直無繳交月薪百分之九，即每月近三千元嘅上繳，直至近月退黨，白鴿黨向佢追討合共九個月、約二萬七千元嘅上繳，但屢試不果，白鴿黨都無可奈何。
支部成員質疑有人教路
有白鴿黨新界東支部成員大爆，謝正楓由當選到退黨一直都無交上繳，佢初當選時就以家庭壓力、有小朋友開支變大為由拖延，支部初時都體諒，直至佢退黨先追討。該名支部成員話，所有區議員當選時都要簽一份《當選責任》嘅黨內文件，講明就算退黨，白鴿黨都有權追討四年任期內嘅上繳，而謝正楓一直都非常單純，質疑佢唔交上繳，係有將軍澳地區人士教路嘅。
至於白鴿黨會唔會有法律行動追討就未決定，不過盡量都唔希望交法庭處理。本報曾聯絡謝正楓，但直至本報截稿，佢仍沒回覆。