政情：國師西瓜招魂 梁天琦即現蹤
雖然本土民主前線（本民前）梁天琦被取消參選立法會嘅資格，但佢全力助選嘅「Plan B」青年新政梁頌恆就成功當選，但梁頌恆同黨友游蕙禎就搞出宣誓風波，早前被法庭裁定取消議員資格。眼見盟友梁頌恆搞出大頭佛，梁天琦完全無現過身為盟友發聲，有「國師」之稱嘅城邦派倡議者陳雲，早前就曾經喺網台節目中嘲諷梁天琦「潛水」，仲話要用西瓜招魂。話口未完，有大專院校學生會日前稱邀得梁天琦兩星期後出席校內研討會，睇嚟西瓜招魂真係非常有效。
一度留加拿大讀書
眾所周知，本民前同青年新政一直關係良好，而梁天琦更加係青政嘅顧問。據了解，喺梁頌恆當選之後，梁天琦長時間唔喺香港，除咗參與電視節目海外拍攝，更遠赴加拿大「潛水」讀書，完全不理世事。宣誓風波期間，本民前黃台仰喺立法會協助游梁硬闖會議廳，又有旁聽青年新政司法覆核案，但梁天琦都未有現身。
深潛個幾月嘅梁天琦被網友不斷指摘，有人就喺佢Facebook（fb）留言，叫佢「上水」帶領支持者進行時代革命，而陳雲之前更曾經喺網台節目中嘲笑梁「潛水」，話要用「擲西瓜招魂」，將梁天琦戲謔為「西瓜琦」。終於日前有人搵到梁天琦嘅行蹤，香港大學附屬學院（HKU SPACE）學生會日前喺fb宣布，邀得梁天琦下月初出席校內研討會，仲會同一個大人物討論吓青年參政，不過研討會係閉門嘅，只限學生同學校職員參加。至於梁天琦屆時會唔會回應「游梁已完」事件，仍然係未知之數。
突「上水」惹連番質疑
有網民就大讚陳雲西瓜招魂有效，亦有人質疑梁天琦「上水」係為青政上訴、或者本土派之後派人參選籌錢鋪路。其實網民會咁諗都不無道理，事關一直有傳梁天琦想去外國留學，所以先放棄做青年新政嘅議員助理，家下佢又突然現身，難免會令人覺得事有蹺蹊，睇怕佢返到香港，或者出席活動時都要同支持者好好解釋一下喇！