中環出更：冒雨踩場 示威者無聲譴責漢奸黎
一批聲稱自發嘅人士尋日冒雨踩上壹傳媒黎智英（漢奸黎）嘅寓所外示威，佢哋帶同寫有反黑金、反中亂港等字眼嘅標語，期間並無叫口號，只係一同做出拇指向下嘅手勢作無聲抗議，以示對漢奸黎嘅不滿。
三度到場抗議
該批示威者三度踩上漢奸黎嘅寓所外抗議，首先喺尋日朝早七時五十分，十七名聲稱自發前來嘅人士冒雨到場，並展示多塊寫上「禍港金主肥佬黎」、「反中亂港肥佬黎」嘅橫額及印有漢奸黎樣貌嘅紙牌，而佢哋喺逗留期間並無叫口號，只係一同做出拇指向下嘅手勢，默默在場站立，隨後一度離開。約於十時三十分，佢哋再次折返，示威者人數增至二十五人，再作無聲抗議，及至下午三時許，示威者又再折返，逗留約四十五分鐘後離去。
近期針對漢奸黎嘅示威行動不絕，自六月十日起計，至今已踏入一百六十六日，連同尋日嘅行動在內，到漢奸黎寓所及將軍澳壹傳媒大樓外示威嘅行動最少達九十四次，當中自稱霸王國際集團員工及苦主佔十次、正義聯盟佔三次，旅遊業界及其他人士則有八十一次。
卓妮