中環出更：廠商會兩球王 定時運動減壓
日日運動身體好，所以除咗努力工作之外，記得都要抽啲時間鍛煉吓體魄。香港中華廠商聯合會（廠商會）早前舉辦咗近兩星期嘅工商界體育邀請賽，項目包括足球、網球同壁球等，夠晒健康又熱鬧。卓妮之後有去頒獎禮，見到廠商會副會長吳宏斌同徐晉暉雙雙獲獎，為廠商會爭光。
首次獲得男子雙打網球賽盛年組冠軍嘅吳宏斌話打咗三十幾年網球，一路都有參與呢個邀請賽，而四、五年前未有盛年組嗰陣佢就曾經攞過亞軍，但笑言始終唔夠啲後生體力好，今次新增咗盛年組之後佢就即刻攞到冠軍喇！依家佢習慣定時運動，皆因平日應酬不時都要飲番兩杯，唔做運動好難抵銷番喎！
吳永嘉專注工作唔落場
至於今年新加嘅壁球項目，徐晉暉就攞到男子冠軍。佢話香港係全亞洲最多壁球場嘅地方，所以香港嘅壁球選手喺世界上無論男定女排名都頗高。佢又指香港人平日工作壓力大，做多啲運動不但可以保持頭腦清醒，仲順便減壓，一舉兩得。
之不過，出名羽毛球勁嘅新進立法會議員吳永嘉今年就冇參加比賽，事關佢要專注立法會事務，話費事影響工作表現，所以唔落場。廠商會會長李秀恒亦非常好動，除咗後生時踢波做前鋒，仲有打籃球，又參加過網球B同C組公開賽，近年就轉打高爾夫球同瑜伽。
立法會議員馬逢國同政制及內地事務局副局長陳岳鵬就負責頒獎，每年都參加渡海泳嘅陳岳鵬話最愛跑步同游水，但自從工作開始忙之後就逼住二揀一，而佢揀咗游水嘞！
卓妮