綠色先鋒：App護沉香
土沉香身價不菲，惹來內地「斬樹黨」覬覦，隨時絕迹本港山野。有保育人士發現，西貢古村的風水林中的沉香樹已幾被悉數斬盡，連帶所蘊含的歷史價值與傳統智慧，亦將化成縷縷輕煙。有非牟利團體開發手機App，讓郊遊人士監察土沉香情況、舉報斬樹黨，一同守護香港的祖先樹。圖︰吳啟偉／文︰呂耀焜、林建平
「風水林好反映到中國人同大自然『天人合一』嘅諗法，但係呢幾條村嘅沉香樹，喺呢幾年幾乎畀人斬晒，後人未必再有機會體驗到古人嘅智慧。」土沉香生態及文化保育協會總幹事何佩嫻早前帶領約二十人的導賞團，到西貢郊野公園考察客家古村的生態及文化，但沿途所見卻大殺風景，不但有土沉香樹身斧痕纍纍，亦發現疑為斬樹黨繫在樹上作為路標的繩結，「佢哋會先斬個傷口，等棵沉香樹結香，再隔半年之後，就會返嚟『收割』，成棵樹鋸走。」何說。
偷伐不絕 恐山泥傾瀉
「沉香生長好緩慢，就算樹齡有成二十年，都只係算幼樹。」隨團解說的該會樹木顧問陳少和指，野生土沉香被偷伐，連帶西貢郊野公園附近的古村亦面臨「沒頂之災」，「沉香樹嘅根好深，可以抓緊啲泥土，冇咗佢哋就會增加山泥傾瀉嘅機會，同埋河堤啲泥沖入河流，有可能會搞到氾濫。」
斬樹黨日益猖獗，若不加遏止，本港野生土沉香或將淪為回憶。非牟利團體TrailWatch開發「監察神器」，行山客只要下載「TrailWatch 徑．香港」手機應用程式，便可隨時舉報斬樹黨蹤迹。
「如果見到有咩異常情況，只要撳舉報事件嗰個紅色掣，再影相過嚟，我哋就會跟進。」TrailWatch義工鄭維音（Harriet）指，今年二月至今，已接獲逾四十宗有關野生土沉香疑遭盜伐的舉報，接報後會核實事件，並要求相關部門調查，而除斬樹外，如發現傾倒泥頭、海岸垃圾，甚至山徑石屎化，郊遊人士亦可作出反映，「最好就影埋附近嘅燈柱編號或景色，或者有GPS定位，同埋寫明發現日期。」
Harriet又指，該手機應用程式不只可用於守衞山野，更可助行山友分享郊遊樂，既可上載美景、行程，「仲睇到近期有咩活動，同埋記錄低自己一共行咗幾耐，用咗幾多時間。」