今時今日，租客有租客嘅痛苦，業主有業主嘅煩惱，既驚租客無錢及時交租，又驚租客係賴死唔走嘅租霸，如果租客係得罪人多、稱呼人少嘅超級攪屎棍，日日有人上門踩場，嘈喧巴閉，冇日安寧，一樣咁頭痕嘅咋！
有辦你睇，人稱「漢奸黎」嘅壹傳媒老闆黎智英，就係呢類「非典型租霸」嘞。尋日之嘛，又有團體前往漢奸黎位於何文田嘅寓所示威，唔講大家唔知，針對漢奸黎嘅示威行動已經持續超過五個月，試諗吓，日日係咁上演抗議騷，莫講話業主眼冤，隔籬鄰舍亦怨聲載道，耳根不得清淨事小，咁落去容乜易樓價都受影響(o架)！
不過話又講番轉頭，好人好姐，如果唔係同漢奸黎有咩深仇大恨，你估真係貪日曬雨淋過癮咩。冇計喇，漢奸黎嘅仇家「族繁不及備載」，有商家投訴被淫媒誹謗，搞到雞毛鴨血；有旅遊業界人士指摘淫媒經常抹黑中國，令內地旅客卻步，打爛業界飯碗；更多嘅則係不滿漢奸黎透過黑金政治操控選舉，以及播獨禍港，各適其適，應有盡有。而唔理係邊瓣仇家都好，大家嘅訴求出奇地一致，就係漢奸黎盡快滾出香港。
群眾嘅眼睛果然雪亮。漢奸黎狡兔三窟，一早喺英、法等地坐擁大量物業，反而喺香港就租屋住，連「根」都冇，擺明一早預咗「滾出香港」。鬼咩，香港搞到今時今日咁嘅田地，作為罪魁禍首嘅漢奸黎自己知自己事，唔搵地方着草，隨時過唔到收尾幾年。淫媒歷年老作新聞，害人妻離子散；宣淫販賤，敗壞社會風氣，大家有目共睹，最過分係漢奸黎反中亂港，唯恐天下不亂，赤膊上陣出錢出力策動佔領之亂都未夠，仲要頻頻發功鼓吹港獨，將嗰班港獨政客當明星咁吹捧，結果唔單止捧出游蕙禎、梁頌恆呢啲辱華小學雞政客，仲培養出一批「新秀」漢奸，佢哋郁吓就去英、美哭秦庭，實行同老漢奸李柱銘薪火相傳，有人形容肥佬黎係「漢奸總舵主」、「港獨總司令」，真係一啲都冇講錯o架！
當然喇，今時唔同往日，中共第五代上台後，對內鐵腕治貪官，對港鐵腕掃漢奸，今上更加講到明「一國兩制」下冇港獨空間，小學雞港獨政客被叮走，明顯係掃獨嘅第一步。問題係，部分年輕人飲漢奸媒體嘅毒奶水大，早就耳濡目染入心入腦，今日打倒一個游、梁，仲有千千萬萬個游、梁吖。
始終都係嗰句，打蛇打七寸，擒賊先擒王，香港要撥亂反正，最重要仲係揪出幕後黑手，如果唔係，隨時野火燒不盡，春風吹又生！