政情：收料站：白鴿黨改選 元老派反撲
民主黨（白鴿黨）喺下月初換屆，正副主席亦將會改選。現任副主席、「乳鴿」羅健熙原定將會接棒做主席，但最近又有風聲傳出，指佢或競逐連任副主席，而主席就由現任立法會議員胡志偉出任。現任黨內中委林子健近日亦宣布有意出任副主席，佢更獲現任主席劉慧卿提名，仲有多位黨內資深元老支持，未知元老派係咪認為黨內嘅年輕化現象變得太快，故需要搵番啲資深黨員中和吓？
乳鴿激進或未得歡心
白鴿黨多名現任立法會議員當中，以乳鴿許智峯、鄺俊宇較為激進，令該黨形象漸趨激進。林子健喺十幾歲嘅時候加入香港民主同盟（白鴿黨前身），其後亦係白鴿黨創黨黨員。雖然林子健現時只係四十出頭，但相比起其他乳鴿，佢對中國有情懷，難怪得到唔少黨內元老級支持。
由於黨內大部分黨員都係中年或以上嘅人士，其支持者都係咁上下年紀，雖然一眾乳鴿喺立法會選舉中成功接棒，但似乎表現未必得到佢哋嘅歡心，難怪近年較低調嘅林子健會選擇出選。
林子健就話近年曾患癌，因經歷生死，故希望可發揮自己，決定參選。佢又透露，曾承諾過家人，若未能成功出任副主席就打算「急流勇退」，留多啲時間陪伴家人；若成功當選，希望可發展黨校，同埋吸引更多年輕人入黨。