政情：蔣麗芸借游蕙禎 向張雲正挑機
青年新政游蕙禎及梁頌恆嘅宣誓風波餘波未了，尋日立法會公務員及資助機構員工事務委員會開會，建制派立法會議員蔣麗芸喺公務員事務局局長張雲正面前借題發揮，指據報游蕙禎嘅爸爸本身係公務員，但支持自己嘅女兒宣揚港獨，要求當局加強公務員對國家嘅認識，避免類似事件再發生。
稱游父作為公務員撐女宣獨
面對突然被抽水，張雲正回應指無法印證個別人士嘅言論，僅重申政府好重視公務員有關《基本法》知識嘅培訓，之前已經搞過研討會同個案研究環節畀公務員同事參與，詳細解釋一國兩制嘅情況及憲法內容等。
同場曾任廉政公署調查主任嘅泛民議員林卓廷，其後亦問及如有公務員入職前同私人機構簽訂合約，要求佢以後唔服務以取得報酬，係咪要同當局申報，張雲正起初小心翼翼，話有關問題有導向性不願評論，但其後表明如合約同相關公職有衝突，公務員有責任申報，林卓廷隨即打蛇隨棍上追問特首梁振英點解有例外，明眼人睇得出係鋪排問及梁振英收取澳洲UGL巨款一事，張雲正因對答時間所限就無再回應嘞！