中環出更：旅遊界廿人轟漢奸黎民族敗類
反壹傳媒黎智英（漢奸黎）嘅行動浪接浪，尋日再有一批聲稱旅遊業界及其他人士踩上漢奸黎寓所外抗議，佢哋手持寫上「反港獨、反黑金」嘅紙牌，齊齊指向漢奸黎嘅寓所高叫口號，轟漢奸黎係民族敗類，怒吼滾出香港。
約二十名示威者尋日朝早約十一時抵達漢奸黎位於何文田嘅寓所外，佢哋手持寫有「肥佬黎滾出香港」、「反港獨 反黑金 肥黎滾出香港」及「民族敗類 滾出香港」等標語及紙牌，又大叫口號，轟漢奸黎透過傳媒抹黑中國，令到內地人不敢來港旅遊，打爛業界飯碗，又透過黑金操控選舉。
黎妻返歸遇阻
期間一輛私家車接載漢奸黎嘅太太回家，部分示威人士一度上前阻礙車輛駛入其寓所，並且探頭張望車內人士係咪漢奸黎，發現唔係漢奸黎後，繼續喺門外示威。佢哋逗留至約十二時離開，及至下午二時再度折返繼續示威，逗留至下午三時和平散去。
近期針對漢奸黎嘅示威行動不絕，自六月十日起計，至今已踏入一百六十五日，連同尋日嘅行動在內，到漢奸黎寓所外及將軍澳壹傳媒大樓外示威嘅行動最少達九十三次，當中自稱霸王國際集團員工及苦主佔十次、正義聯盟佔三次，旅遊業界及其他人士則有八十次。
卓妮