中環出更：太子鐘錶擴張 迎市場復甦
太子珠寶鐘錶位於彌敦道彩星中心嘅旗艦店尋日舉行開幕儀式，數百名城中名流及業界翹楚齊去送上祝福。現時高消費市道仍未有起色，鐘錶界老行尊孫秉樞形容太子逆市擴張係「寒冬中的暖流」，太子珠寶主席鄧鉅明就話好多玄學家話明年雞年係好年，預計明年下半年市道會好轉。佢話機會係留畀有準備嘅人，所以今次重新裝修旗艦店，並增設會所餐廳招呼貴客，以迎接市場復甦。
現場有好多靚太去撐場，太子珠寶副主席鄧宣宏雁滿場飛忙住招呼。卓妮見保良局前主席梁王培芳、大新金融主席王守業太太嚴君琴，同遠東發展主席邱達昌太太邱吳惠平三人好啱傾，一齊喺店舖內周圍睇靚錶，唔知佢哋揀錶有乜特別喜好呢？
靚太聚首睇錶 各有所愛
王太笑稱鍾意新錶，啲舊錶戴悶咗就收埋先，等潮流興復古又可以戴番。邱太就鍾意戴細錶，因為佢嘅腕骨纖細，型格嘅大錶唔係咁啱佢。
愛沙尼亞共和國駐港名譽領事林建康及太太林黃寧艷、靚女歌唱家周旋、善德基金會副主席蕭何元鳳（Amy）及博愛醫院總理藍王雲仙（Mina）等人都有到場。周旋嘅藝術中心開幕吸引好多城中名人關注，Amy及Mina就搵周旋學唱歌，啱啱上咗兩次堂，尋日三人就上完堂先至一齊出席活動。周旋讚兩人唱得唔錯，Mina笑稱，佢同Amy打算喺下個月初善德基金會就職晚宴中獻唱，唔知到時兩位靚太唱功如何呢？
卓妮