政情：星星合照「高攀」高佬賢
環境局局長黃錦星（星星）尋日同立法會漁農界議員何俊賢（高佬賢），同場出席一個推動有機低碳生活活動後合照，星星企喺身高六呎三吋嘅高佬賢身邊，可能唔抵得佢咁高，突然笑笑口咁話：「議員你太高」之後就即刻踮起腳尖，高佬賢都好識做咁稍為蹲低咗少少，兩人真係夠晒默契！
之後高佬賢被問到喺英國留學嗰陣有冇申請英國護照，佢就講到明自己曾經攞過BNO，即英國國民（海外）護照，但回歸之後好快就攞特區護照，佢話從來冇諗過要申請英國國籍，又話特區護照方便好多，完全「冇誘因」要留住本BNO，事關就算攞住BNO都唔代表你喺英國時會畀人當係「自己人」，所以本BNO到咗期之後已經冇再換過證喇！
何憶述留學遭歧視欺凌
佢更大爆自己喺英國留學時，曾被當地人欺凌，有過一段不愉快嘅經歷喎。高佬賢憶述佢喺英國生活時，有一次放學過馬路，迎面有部VAN仔駛過，個司機見佢係華人就即刻開窗向佢吐口水，佢梗係嬲到震啦，仲話「條氣唔順到依家」。佢勸勉準備去英國留學嘅同學仔「要做好心理準備」可能會被當地人欺凌咁話。