政情：白鴿謀霸位 封殺范國威？
青年新政游蕙禎、梁頌恆早前被法庭裁定取消立法會議員資格，新界東、九龍西嘅議席勢必需要補選，喺立法會選舉大敗嘅新民主同盟范國威同工黨李卓人都盛傳有意競逐議席，由於僧多粥少，為免建制派漁人得利，有人就建議舉行初選。據了解，本身喺新界東已經有一個議席嘅民主黨（白鴿黨）亦有意加入戰團，白鴿黨咁積極參戰，唔通係因為同范國威有牙齒印，所以不惜一切都要封殺佢？
未等立法會正式刊憲公布兩個議席出缺，補選嘅討論已經如火如荼。除咗早前政圈盛傳嘅幾個人名，尋日有白鴿黨資深黨員透露，該黨有意派人參與民主派嘅初選，已有黨員表示有興趣，其中出選新界東嘅機會較大，今日選舉委員會會開會討論。不過佢拒絕透露初選人選，認為目前未係合適時間公布。該黨員否認參與初選係封殺新同盟，認為黨友有意願黨應該支持。對於參與初選，白鴿黨單仲偕接受查詢時承認，會積極考慮派人參與，亦會尊重初選結果。
內部有聲音指不符道義
雖然黨內高層希望參與初選，但有唔少黨員就對出選有保留。有該黨立法會議員認為，雖然唔認同青政兩人處事方式，但佢哋始終被粗暴嘅方式褫奪議席，道義上唔應該喺法庭完成處理上訴前，就興高采烈討論補選。佢又話仲有十三個民主派議員都面對被褫奪議席嘅危機，不如先處理呢個問題。
另一個白鴿黨新界東支部成員話，之前曾經參與黨內立法會初選嘅候選人都無舉手出選，質疑所謂「希望參與初選」只係留條後路，到時有無人選都無所謂。佢又認為支持新同盟可顯示大黨「氣度」，其實未嘗不可。
早前超區初選失敗告終
不過，以上嘅討論都係建基於民主派可以順利協調初選，而有分析認為，成功協調機會其實唔大。好似當年公民黨（公文袋）前議員湯家驊辭去新界東議席，楊岳橋試圖協調本民前、青年新政進行初選失敗；而之前立法會選舉民主派都有就超級區議會討論初選，亦因為新同盟唔肯而再次協調失敗。就算唔計白鴿黨同新同盟，喺民主派咁多新仇舊恨下，大部分政黨都只係口講支持初選，其實係「口和心不和」兼各自盤算，民主派唔解決「狗咬狗骨」嘅問題，都唔使旨意攞番個議席。