中環出更：名人愛瓷畫 余徐菊霞桃李滿門

香港國際瓷畫文化藝術節早前喺裕華國貨總店舉行開幕儀式，來自世界各地嘅瓷畫大師帶埋作品參展，好多識得畫瓷畫嘅城中靚太亦踴躍作畫參與慈善義賣，事關所得款項將會捐畀關懷殘疾人士嘅香港耀能協會，用喺推廣殘疾人士嘅藝術發展之上。居中牽線嘅耀能董事彭徐美雲話，佢同香港瓷畫會會長余徐菊霞（Ida）學瓷畫幾個月，每次上堂都好開心，今次就畫咗六組杯碟做慈善義賣，仲一早就畀人買晒添！
黎棟國太太（右）及李少光太太（中）展示作品同余徐菊霞（左）合影。
黎棟國太太（右）及李少光太太（中）展示作品同余徐菊霞（左）合影。

邊個咁識貨呢？咪就係佢老公彭曉明囉！彭太笑言以前好難坐定定幾個鐘頭唔郁，依家就經常畫到唔肯瞓覺，成日被老公投訴。喺杯盤碗碟上面畫畫，勝在獨一無二，又夠晒實用，所以彭太已開始畫碗碗碟碟，打算喺屋企粗用，等日後畫得好啲就可以用嚟請客用。

跟Ida學瓷畫嘅仲有保安局局長黎棟國太太同前局長李少光太太，黎太學瓷畫學咗八年，最鍾意畫花同雀，屋企有好多作品，仲經常被老公攞去送贈好友，但幾年前佢跌親整傷條腰就冇再畫喇！

國際大師匯聚顯身手

耀能主席梁乃江、裕華董事長余國春同兒子余偉傑、Ida嘅老公裕華董事總經理余鵬春都有到場。余偉傑話裕華已支持舉辦國際瓷畫節多年，今次係最熱鬧嘅一次，因為有來自美、法及葡萄牙等世界各地大師參與，當中包括被喻為全球最叻嘅葡萄牙瓷畫大師Fillipe Pereira，佢仲即場示範作畫，吸引好多粉絲圍觀添！

余國春（右）獲Fillipe Pereira（左）贈送雄雞圖案靚瓷畫。（葉華英攝）
  • 余國春（右）獲Fillipe Pereira（左）贈送雄雞圖案靚瓷畫。（葉華英攝）
彭徐美雲（右）同余偉傑（左）幫手慈善義賣，梁乃江（中）十分感謝。
  • 彭徐美雲（右）同余偉傑（左）幫手慈善義賣，梁乃江（中）十分感謝。

卓妮

第一手消息請下載on.cc東網iPhone/iPad/Android/Windows Phone Apps