「檀島灘岸點點燐光，豈能及漁燈在彼邦？」香港自然資源豐富，尋幽覽勝根本唔使山長水遠去外國。好似話睇珊瑚咁，澳洲有大堡礁，香港西貢海下灣嘅珊瑚群落亦非常多樣化，吸引唔少潛水客慕名而至。可惜吖，當局保育不力，呢類自然美景買少見少，再咁落去，遲早冇呢支歌仔唱嘅咋。
唔係危言聳聽o架！有環保團體聯同三十多位海洋專家，根據國際公認嘅重要生態或者生物意義海洋區域標準，挑選出三十一個香港水域內嘅海洋生態熱點，製作「海洋生態熱點地圖」，其中西貢海下灣、企嶺下海、深灣等榜上有名。據專家講，目前全港八十四種珊瑚當中，有六十多種可以喺海下灣搵到，但近兩年當地珊瑚死咗超過九成，幾乎面臨「種族滅絕」。至於死因則眾說紛紜，有人質疑係附近發展丁屋，污水流入海洋所致，有人就話紅潮、海水溫度上升以至海膽暴增都係原因。
最得人驚嘅係，除咗海下灣珊瑚岌岌可危，其他生態熱點嘅情況亦唔好得幾多。好似企嶺下海咁，大片紅樹林一向係海馬、螺等生物嘅棲息地，具特殊科學價值，弊在附近村屋工程造成嚴重污染，令到佢哋生存受到威脅。至於西大嶼山水域，受機場第三跑道工程影響，中華白海豚更加陷入絕境添。
好嘞，環保團體自發進行調查，媒體大篇幅報道，引起社會關注，咁官老爺又做乜呢？一句講晒，翹埋雙手，乜都唔做。環保團體促請港府二○二○年前將最少百分之十具有高度保育價值嘅海洋同海岸劃為保育區，以達成聯合國目標，查實西貢海下灣正正係香港首批成立嘅海岸公園之一，至今已經有二十年歷史，咪一樣搞到珊瑚絕種咁滯，照咁睇，負責管理嘅漁護署胡混度日，之唔係滅絕珊瑚嘅元兇囉。
所以話，即使設立保育區，官老爺不監不管，一樣蚊都瞓蛇都死。大家應該記得，當年香港地質公園升呢為世界地質公園，港產官僚打鑼打鼓，鬆毛鬆翼，點知得戚過後關人個關，公園一度幾乎畀遊客踩沉，攀石有之，亂咁敲打岩柱有之，執石頭返屋企做紀念品有之，搞到七國咁亂。
查實唔使講到保護生物多樣性咁複雜，淨係郊野公園清潔問題，當局一樣搞到一鑊泡，呢頭大幅減少垃圾桶數量，鼓勵人自己帶走垃圾，嗰頭又冇做好宣傳教育，結果弄巧成拙，郊野公園淪為垃圾崗，唔少美麗海灣變成垃圾灣，睇見都眼冤。你話嘞，官僚冇神經、冇靈魂，香港自然風光幾美麗、自然資源幾豐富都好，遲早都畀呢班敗家仔敗光。