政情：蒙德揚居日生涯 唔慣如廁遇女工
香港浸會大學尋日頒授榮譽博士學位畀四位傑出人士，包括信興集團主席兼行政總裁蒙德揚、著名影視製作人伊利莎白‧戴尼、研究美籍非裔文學嘅著名學者瓦萊麗‧史密斯同傑出數學學者馬丁‧海瑞爾。
講起蒙德揚最為人熟悉嘅莫過於佢同父親當年一直與日本嘅松下電器靠個「信」字握手合作兼擔任代理至今，蒙德揚年輕時亦因此曾喺日本居住四年學習日本企業嘅技術同管理。佢笑言最初到日本時有很多文化都唔習慣，例如日本男廁同女廁嘅清潔工人都係女士，就算佢去緊廁所，隔籬都可能有個女士肆無忌憚咁喺度清潔喎。
除咗蒙德揚太太同囝囝Justin有到場之外，仲有和富社會企業會長李宗德。原來李宗德同蒙德揚及Justin都係喇沙校友，李宗德話一定要嚟捧蒙德揚場，跟佢學吓企業社會責任方面點做。蒙德揚身為出名運動叻嘅喇沙仔，唔知又有冇同個仔較量吓？熱愛跑馬拉松嘅佢就自爆打網球同游水輸畀個仔，阿仔就笑阿爸因為咁而轉跑長跑，因為長跑佢覺得悶，所以唔會同阿爸爭喎！