政情：湯恩佳籲年輕人多讀「四書十三經」

近日立法會宣誓風波愈搞愈大，議員喺宣誓時使用「支那」字眼引起公憤。孔教學院院長湯恩佳日前出席一個有關中國文化嘅活動時就直言呢啲行為好可恥，又批評部分年輕人宣揚港獨。湯恩佳話中國自古都係禮義之邦，香港從來都係中國嘅，後生仔應該讀多啲「國學」，了解多啲中國嘅文化咁話。

湯恩佳又話香港係中國人嘅地方，即使曾經畀英國殖民。對於有立法會議員宣誓時用辱華字眼，佢就大鬧︰「都未見過咁唔愛國嘅人！」仲質疑係咪有美國做「後台」。佢認為香港嘅年輕人要多啲去了解中國文化先得喇。

至於點樣了解中國文化，湯恩佳建議要讀多啲「四書十三經」。「四書五經」就聽得多，乜嘢係「四書十三經」呢？佢就話「十三經」就係儒家十三部經書，包括《尚書》、《禮記》等。如果個個咁乖坐定定睇書，應該都冇人得閒搞港獨喇！