政情：拉衫尾入局 阿毛退「袋」 家醜外傳
公民黨（公文袋）又有立法會議員退黨！一向同黨友「貌合神離」嘅議員毛孟靜（阿毛），尋日召開記者會宣布正式退出公文袋。佢解釋同公文袋「唔咬弦」，仲形容為「冰封三尺非一日之寒」。雖然佢口講「君子分手，不出惡言」，但就爆響口話六年前鄭宇碩同陳家洛競選公文袋主席，因黨內成員都傾向支持陳家洛，因此對個黨產生「芥蒂」咁話喎。另一邊廂，公文袋領導層解釋，當年陳家洛係經黨內嘅民主程序做主席，符合章程。老實講，阿毛已經拉人衫尾，拖足六年先退黨，竟然仲擺人上枱。
阿毛尋日聲稱同黨「漸行漸遠漸無聲」，又話大家主要分歧係喺本土、拉布同埋黨定位呢啲議題上。佢話退黨係自己嘅決定，唔關任何人事。話雖如此，佢仲提到四年前參選立法會時，佢就用「拒絕大陸化」口號，但黨反對，要求用「拒絕赤化」，但佢一於少理，仲話「睬佢都傻」。唔單止咁，阿毛仲批評，話呢個黨立場一時一樣，但就話唔關署理黨魁楊岳橋事。
領導層：公道自在人心
面對同阿毛「分手」，公文袋領導層表示可惜，同時尊重佢嘅決定，未來會重新編配工作。佢哋仲話阿毛本身都冇畀機會黨去挽留佢，相信佢都打算頭也不回咁走。面對阿毛批評公文袋一時一樣，黨領導層反駁，話「公道自在人心」。至於阿毛走咗之後嘅安排，楊岳橋就形容「六個人場波要五個人踢」，以後要互相補位。
阿毛亦透露，其實兩年前佔領行動期間已經想退黨，咁啱撞正佔領運動同區議會選舉，拖吓拖吓所以依家先退黨。另外，佢仲話今年立法會選舉期間，發生嘅事，搞到佢對黨嘅感覺更加壞，但又唔肯透露係乜嘢事喎。講啲唔講啲，想點呢？問番公文袋嗰邊，高層就話唔知阿毛所講嘅係乜嘢事。
當選兩個月後就走人，阿毛尋日被問係咪有過橋抽板。佢聲稱用公文袋資源少之又少，仲話退黨後唔會呼朋喚友齊齊走。至於公文袋方面，領導層就引用番「君子分手，不出惡言」，叫記者唔好引導佢講嘢。
創黨十年 已四議員退出
心水清嘅都聽得出阿毛同公文袋領導層係劍來劍往喇！其實公文袋創黨十年，阿毛已經係第四個退黨議員，其餘三個包括民主思路召集人湯家驊、黃大仙區區議員譚香文同工黨議員張超雄，依家阿毛仲爆大獲，估計黨內應該有唔少內訌添！竟然將家醜外揚，公文袋真係多得佢唔少呀！