中環出更：城中叻女分享擇偶貼士
愈來愈多高學歷、高職位、高收入嘅女士搵唔到另一半，卓妮早前喺活動上見到一班城中叻女，當中好多事業有成又家庭美滿，唔知佢哋有乜貼士呢？金紫荊女企業家協會（協會）主席彭芷君（Gigi）就笑言，好多男士都想搵一個賢良淑德嘅太太，女士掛住讀EMBA或者MBA嘅同時，不妨學吓煮飯或者其他興趣，煮得一手好菜一定有分加喎。
咁多又靚又叻嘅女士若未搵到另一半，Gigi就建議可以多啲主動約埋一班朋友搞活動，當識人都好，仲有最少畀三次機會去了解一個人，因為每個人都有狀態唔好嘅時候，又自爆第一次識老公辛光耀嗰陣以為對方好木獨，點知後來先發現老公好搞笑，所以話第一印象真係未必準o架！佢仲提大家揀對象唔好太「用腦」，被外在條件規範，因為外在條件會變，所以都係「用心」揀願意共同進退嘅就好。
陳徐巧嬌公私分明尊重老公
呢日協會舉行慈善基金成立典禮暨女企業家獎頒獎典禮，香江集團總裁翟美卿同慕詩國際集團副主席陳徐巧嬌都係得獎者之一。被問到好多人話夫妻喺同一間公司工作易有爭拗，陳徐巧嬌就分享要公私分明之餘，有乜嘢都絕對唔可以嬲超過日落，仲大耍冧功話佢老公先係主席，所以作為副主席嘅佢就算有意見都好，最後一定要尊重上司、即係佢老公嘅決定，真係夠晒得體。
聽完女士意見梗係要聽吓男士點講，菁英會成員楊哲寧話好多男士都唔太介意女士職位或收入，所以如果女士一定要搵叻過自己嘅人就會少咗好多選擇，相反叻過佢嘅男士就會因為冇受呢樣嘢限制而選擇較多，咪出現類似情況囉！
卓妮