公屋輪候冊大排長龍，上樓時間愈拖愈長，早就唔係新聞嘞，但長到要四分之一世紀至上到樓，都咪話唔得人驚。正如電視劇主角話齋，人生有幾多個十年吖，咁等法，黑頭人變白頭人都似。
係人都知，公屋平均輪候時間屢創新高，目前已經延至四年半，離三年上樓目標愈來愈遙遠，但呢個數字都係粉飾太平嘅咋，反映嘅只係一般申請狀況，喺目前計分制下，如果以長者身份或家庭申請，上樓仲叫做有啲希望，換作非長者單身人士咯喎，直頭絕望。咁就難怪，早前有社福機構協助兩名非長者單身人士入稟高院申請司法覆核，挑戰房委會嘅公屋配額及計分制，話呢個去年新修訂嘅制度對非長者單身人士唔公平，甚至係年齡歧視喎。
聽吓其中一位主角點講喇。今年四十一歲嘅梁先生○五年申請公屋，等到前年原本家鄉在望，差十幾分就可上樓，點知房委會突然改變玩法，年紀大嘅單身申請者可以獲得一次過加分，結果即刻令梁先生由隊頭跌落隊尾，起碼仲要等多十四年，即係前後二十五年至上到樓。最陰功嘅係，梁先生輪候公屋期間因為被劏房業主大幅加租，搞到一度要瞓街，簡直禍不單行。
即係咁，呢單官司法庭最終會點判，仲要睇過至知，但點判都好，結果都係順得哥情失嫂意。房委會成員就講明，一旦敗訴，平均輪候時間勢必延長至超過八年，都幾大鑊㗎。講真，房委會修訂計分制嘅原意，係希望畀家庭及單身長者呢類最有住屋需要嘅申請人快啲上樓，但咁做就無可避免要犧牲非長者單身人士嘅利益；掉番轉頭講，如果改變計分制，遷就非長者單身人士，咁又輪到家庭及長者申請人受害。公營房屋就係得咁少，餅就係得咁細，點樣劃分先至算公平，真係見仁見智，但唯一可以肯定嘅係，港府挑動窮人鬥窮人，最終受害嘅咪又係基層市民。
講到尾，如果唔係港府無能，又點會搞到基層市民想搵片瓦遮頭仲難過登天吖？難為官老爺仲好意思出嚟死撐，話未來五年嘅公屋落成量雖然同長遠房屋策略定下嘅目標相差一大截，但再過五年就會有所增加，叫人等吓先喎，咁同望梅止渴、畫餅充飢有乜分別吖。
講起就火滾，港府一味吹水唔抹嘴，一時話房屋問題係施政「重中之重」，一時又話用盡「洪荒之力」增加供應，結果張張都係空頭支票，冇一張兌現。計功夫茶話齋，官老爺一個二個貨不對辦，擺明違反商品說明條例喇，市民與其挑戰公屋計分制，不如向海關舉報官老爺欺詐喇！