受聘於政府橫洲發展項目顧問嘅公司奧雅納，同時又係新世界永寧村項目規劃嘅顧問公司。運輸及房屋局局長張炳良日前指負責研究嘅奧雅納並無將資料用於其他地方，但同日發展局證實奧雅納參與顧問合約時未遵照合約條款，私下將政府內部資料作規劃評估，亦冇申報利益衝突，按規定奧雅納被罰「停賽」三個月，唔可以投標。喺呢次風波當中，發展局局長陳茂波（波叔）兜巴摑張炳良不在話下，仲揭示咗政府部門各自為政，最弊嘅係政府已經不停被外界質疑私相授受、官商勾結，今次簡直水洗都唔清。
