政情：劉炳章暗寸姚松炎 政治凌駕專業
香港專業聯盟主席劉炳章，尋日喺該聯盟成立十五周年嘅晚宴活動致詞時開火，不點名批評反對派嘅議員，指喺面對近來嘅政治爭拗時，儘管一啲政策已有共識及利民，最終仍被一啲專業界別嘅議員拉布拉倒，好似創新及科技局拉咗三年咁，仲有醫委會改革法案同版權修訂條例等，歸咎有個別議員並無顧及整體利益，企喺民意對立面令政策受阻甚至被拉倒。
劉炳章又暗示有同佢屬於同一界別嘅議員，以政治凌駕專業，講出二○四七土地大限等不實言論，漠視政府有批出超出於二○四七年嘅土地契約等。咦！同佢同一界別又會講呢啲嘢，佢講緊嗰個應該係建築界嘅姚松炎喎。
對於前年嘅佔領行動，佢批評有啲法律界代表曲解法治、鼓勵違法，提出犯法不犯罪等歪理，美化破壞、踐踏法治。佢仲提到有候任立法會議員侮辱國家，展示港獨標語，更有人為佢公開護短，為其開脫，及開路硬闖議會，令專業界人士形象掃地。
指人大釋法天經地義
劉炳章認為港獨分裂國家，指事件超越香港行政權力，稱釋法天經地義，又認為香港司法獨立只係相對於行政立法而言，並不凌駕中央，又譴責港獨及分離主義，指國家安全無妥協餘地，佢認為港獨超逾特區自治範圍，因此人大主動釋法天經地義。
佢指出專業界別嘅形象經百多年來建立於市民嘅期望，如果以私利凌駕於公眾利益，或政治凌駕於專業，等同自毀長城。
