政情：沈祖堯着格仔衫騷瘦身成果
中大校長沈祖堯喺學生心目中形象親民，原來佢嘅衣着亦緊貼潮流，不遜時下年輕人。佢尋日出席一個感謝祖父母嘅頒獎禮，致詞時除咗呼籲大家向家中長輩盡孝道，又主動賣關子，叫現場觀眾估吓佢以一身白底紅藍紋「格仔衫」現身，有別於盛裝出席嘉賓，當中有乜玄機？莫非沈校長知道時下盛行文藝青年風，想以一身文青「格仔衫」展示自己走在時尚尖端？
笑稱「最隆重街坊裝」
沈祖堯笑着解釋佢住喺中大校長寓所漢園，寓所鄰近舉行頒獎禮嘅香港專業教育學院沙田分校，故尋日特意以「最隆重的街坊裝」現身。佢搞笑咁話，着呢件「格仔衫」能展示早前努力健身嘅成果，如果着西裝就會遮掩好身材，無緣同在場觀眾分享。聽佢咁講，台下長者紛紛笑到「見牙唔見眼」，沈校長氹「老友記」果然有辦法。
講明中大校長做到一八年就重返醫學院教學嘅沈祖堯亦透露日後大計，話喺教學嘅同時，希望花半年時間到世界各地吸收醫學新知，最想研究治療癌症嘅新方法，但就唔會擔任公職嘞！