政情：周博賢發帖 向汪阿姐挑機

「文化同行」有十五人，除咗周博賢，仲有喺上屆同樣參選過立法會體文界嘅藝術家周俊輝、區議員兼香港文化監察主席嘅楊雪盈同藝術家白雙全等。團隊之一嘅資深戲劇導師陳桂芬話十五人對民主理念一致，再加上佢哋係活躍嘅前線文化工作者，所以佢哋更了解基層業界需要。

下屆特首人選未有心水

多個非建制嘅特首選委團隊都係以反對現任特首梁振英連任、人大八三一決定、爭取雙普選及廢除功能組別為原則，「文化同行」亦唔例外。佢哋仲認為作為特首係要代表港人立場、為港人發聲同埋「講人話」，但現階段就未有心水人選。周博賢透露，需要睇埋候選人政綱先再作決定。

另一邊廂，汪阿姐身為全國政協委員，其團隊亦有親建制人士，包括一向關注時事嘅導演、春天舞台製作有限公司創辦人高志森、前港區全國人大代表兼現任藝發局主席王英偉等。當日汪阿姐同團隊報名時，被問及會唔會支持梁振英連任，汪阿姐就話要睇埋候選人政綱先，咁梁呢四年嘅表現喺點？佢話「佢做成點大家心裏面都知道」。

楊雪盈話對手「高階層」

講番個「英雄帖」，楊雪盈話上屆選委係自動當選，而選民都唔了解選委嘅立場，所以今次搞對談希望係提高選舉透明度。佢仲話時間同地點都可以遷就晒對方。不過佢就形容對手係業界嘅「高階層」，身處資源分配機構較高嘅位置，唔排除有利益衝突，仲指佢哋「位高權重」添！又話希望邀請到佢哋，聆聽業界嘅聲音。

嘩！講到汪阿姐嘅團隊係「高階層」，似乎係暗寸佢哋好離地喎。「文化同行」做咁大場戲都係想挑機汪阿姐啫，一向敢言嘅汪阿姐會唔會接招，同呢班前線工作者對談，一較高下呢？