中環出更：陪仔女行山「齊」拒做怪獸家長
香港善德基金會尋日舉辦善德遠足百萬行，卓妮見到基金會常務副主席湯修齊（Henry）同個仔湯德安（Harris），呢對父子兵都一早上陣出嚟行山，身體力行支持。講起現時有部分年輕人嘅言行舉止不時表現激進，湯修齊就感慨其實今時今日做家長都好難做。
本身係家庭與學校合作事宜委員會主席嘅湯修齊話，依家好多家長都係虎爸虎媽，希望子女成績好，又要佢哋上好多興趣班等等，但其實小朋友成長唔應該只係關心佢哋嘅成績，變成怪獸家長，應該多同佢哋溝通，好似多啲一齊出去戶外活動咁，增進感情，事關喺子女年幼時培養到深厚感情，將來子女大個咗有自己獨立思考及見解之後，亦會比較願意跟家長分享及討論，佢自己都係咁教啲小朋友（口架）！
見企喺湯修齊旁邊嘅湯德安身高六呎幾咁高，唔知係咪就係因為佢哋成日一齊運動嘅成果？湯修齊就話兒子有打手球，而平日佢哋一家都不時一齊行山，西貢同九龍區好多地方佢哋都有行，不過就多數會揀較平坦啲嘅路線，咁阿女都會一齊行喎。
董吳玲玲搞遠足籌款 有益身心
至於主席董吳玲玲就話平日太忙好少時間做運動，不過善有善報，皆因佢做咗主席之後每年都會有兩次行山籌款嘅機會，做運動都多咗，有益身心。而副主席黃美斯就話籌款成績唔錯，呢日佢哋由大潭水塘道嘅燒烤區起步，行咗大約三點五公里，希望籌得嘅善款可以用嚟培育科研人才。
董吳玲玲兒子董必政同女友Naomi都有出席，董必政仲帶埋愛犬Whiskey一齊嚟行山添！自細有養狗嘅佢平時都成日帶埋Whiskey出街散步，做個盡責主人。
卓妮