的士崇光外車禍 傷者骨折生計受損
【本報訊】銅鑼灣SOGO外前日發生的士衝上行人路撞途人恐怖車禍，首當其衝被的士撞低的姓鄧（五十四歲）男傷者，目前仍在醫院骨科留醫，意外中他右腳和左手骨折，要打石膏固定，除了右手尚能活動外，雙腳及左手均動彈不得，需躺臥病床。他昨日親述被撞一刻時慨嘆：「一個字『痛』！」並坦言：「最慘我唔郁得啦！瞓覺都好辛苦！轉唔到身！」
同為的哥 斥事主自私
任職的士司機的鄧是家庭經濟支柱，育有一子一女，他擔心今次受傷令家庭經濟出現問題，怒斥該的士司機自私：「依家有人受傷，賠都賠唔番，你賠咩畀人？」鄧憶述車禍經過時又反駁的士司機稱有人衝出馬路，強調：「冇人衝馬路，個個都好乖！」他續指，警方暫未為他落口供，稍後會向警方清楚講述經過。
至於鄧的母親，亦為其兒受傷感憂心，坦言：「最傷係我個仔……仲瞓喺醫院，手停口停，都唔知點解佢（的士司機）揸到咁？成架車剷到上行人路咁衰！」並質疑該的士司機駕駛態度有問題，自己日後過路亦會加倍小心。
肇事司機獲保釋候查
事發於前日，銅鑼灣崇光百貨地下軒尼詩道門口對開一輛的士突然失控衝上行人路，八名途人首當其衝，其中四人被炒上車頭冚，撼爆擋風玻璃，四人送院搶救，另三人自行到醫院求醫，另有一傷者未有求醫。肇事的士司機涉嫌危險駕駛被捕，經扣查後獲保釋候查。