我有正能量：義工隊征東龍洲 崖底執垃圾
「風火山林」行山隊亦與不同環保團體合作舉辦活動，如帶領中小學生上山參與清理、分類及回收垃圾，作為環保教育一部分。他們今年年初更遠征東龍洲，冒嚴寒強風沿山壁游繩下崖，並自設飛索裝置，將懸崖底的垃圾吊上地面運走，當時在場的Kane憶述，垃圾數量之多可謂「嚇親」，「啲垃圾堆到高過成個人！」
「懸崖底下面，由膠樽、膠袋等普通垃圾，到電器、工業廢料同電子零件，都應有盡有。」Kane表示，眾義工將所有垃圾分類及回收後，竟可裝滿逾二百五十個垃圾袋，「呢個數字只係冰山一角，由此可以想像，咁多年嚟我哋製造嘅垃圾量，有幾驚人！」
裝滿250個垃圾袋
在懸崖底收集得來的垃圾中，Kane發現絕版多年的膠樽、鋁罐和食物包裝紙，部分更因受日曬雨淋多年，已逐漸分解成碎塊，「膠樽、膠袋唔會自然分解，只會碎開一粒粒，畀動物食落肚會危害動物，埋入泥土仲會產生毒性，足以影響生態幾百年，如果我哋唔減少塑膠垃圾，將來受害嘅只會係我哋自己！」