我有正能量：山野記者 搜尋遺迹
郊野公園變「垃圾公園」，不少行山人士經常「冇手尾」，遺留大量垃圾，污染自然生態。有行山隊「睇唔過眼」，自發組織清理行動，偕同義工攀登本港多個山峰及郊遊熱點，找尋垃圾蹤迹，甚至化身「山野記者」，透過文字和圖像，宣揚「山林零污染」，維護郊野清潔。
「成立行山隊之前，我哋成班朋友都係行山發燒友，組隊起初，都係為咗定期搞吓活動，等大家可以多啲聯繫感情。」「風火山林」行山隊隊長華嘉昌（華生）表示，行山隊自一三年起，開始在社交網站上號召網友一同「出征」，足迹已遍布港九多個行山熱點，「唔只行山，我哋都會嘗試定向、夜行同攝影等活動，但有時見到咁多垃圾，真係會睇唔過眼，幫手執埋一份，之後就索性定期上山執垃圾，做得幾多得幾多。」
撰網文出雜誌宣環保
近年都市人注重健康生活，不少人愛上四出游走郊野，逃離城市喧囂，惟部分人「冇手尾」，將大量膠樽、膠袋和鋁罐等隨處拋棄，浪費之餘更破壞自然環境。隊員梁遠逸（Kane）和史雷杰（Joey）經常與義工「捐窿捐罅」，到寶馬山、紅香爐峰等郊野公園範圍以外的行山及攝影熱點，進行清除垃圾行動，「當局唔會派人上去清潔，垃圾多到離譜，最恐怖係棄置多年嘅汽水、啤酒罐，入面啲水發晒酵，臭到想嘔！」
不但執垃圾，行山隊員有時還會放下行山裝備，改帶相機及筆記本，化身「山野記者」，定期在社交網站撰寫評論文章，兩年前更自費出版雙月刊，向行山愛好者提供環保新聞資訊。擔任攝影師的Joey認為，出版雜誌有助推廣環保，「我哋唔只淨係寫行山，之前我哋花咗兩個月，去報道比賽派免費跑步衫嘅浪費問題，希望可以藉此宣揚保育減廢嘅重要性。」
「近年愈嚟愈多人行山，但唔係個個都有相關知識，除咗會構成危險，亦會無意中對環境造成破壞。」華生慨嘆，儘管近日行山人士的保育意識有所增強，但仍有人誤以為垃圾會有人清理，不過，他們並未灰心，「只要每人肯做多少少、行多一步，香港嘅郊野終有一日會達成零污染！」