美國啱啱選出下任總統特朗普，好多美國選民都希望佢可挽救低迷嘅經濟，估唔到財經事務及庫務局局長陳家強都竟然將打救香港經濟寄望喺特朗普身上。陳家強尋日喺一個電台節目上話，特朗普上場後料將結束美國低息政策，未來可能加息兩厘，有望令香港走出經濟困境。雖然香港因為港元與美元掛鈎而失去息口調控經濟嘅主動性，但係搞好經濟仍有好多方法，好似對上一次美國加息，香港嘅銀行都無跟隨，即使未來加息，亦未必會跟隨，唔通陳家強發緊夢仲夢見特朗普？
