政情：好爸唔易做 工總青委三子頻撲幼園面試
中華廠商聯合會尋日大搞足球邀請賽，幾位香港工業總會青委亦有到場支持，但身穿運動服裝嘅潘偉業（Albert）就得個睇字，因為佢同日稍後時間要陪兩歲嘅囡囡去幼稚園面試，所以齋睇唔落場囉！Albert透露，現時幼稚園會為父母進行面試，所以不便落場。佢話囡囡呢個月有成九場面試要應付，最誇張仲係一日去三間，平日太太仲會同囡囡玩面試遊戲，希望囡囡能夠盡早適應面試，真係聽到都覺得辛苦！
工總青委主席劉燊濤都面對同樣情況，快將兩歲嘅囝囝亦有六場面試要應付，好彩分開三個月進行，所以唔算太辛苦。佢話無乜特別同囝囝練習，只係安排多啲機會畀囝囝接觸陌生人，幫佢練膽咁話。
嚴子杰女兒 「惡補」普通話
至於嚴子杰嘅囡囡早前都有去幼稚園面試，竟然被問到識唔識廣東話、英文同普通話三種語言，囡囡咁細個當然唔識啦，所以現時要安排老師教授普通話。其實咁細個面試要求咁多嘢認真離譜，識就唔使去讀書啦！