政情：立會衝擊成風 陳沛然自備急救包開會
新一屆立法會開始咗唔夠一個月，已經多次出現議員同議員助理衝擊立法會會議廳事件，仲試過搞到有議員同立法會秘書處保安人員受傷添，而每次都要本身係內科醫生嘅醫學界議員陳沛然（Pierre）出動照顧傷者。
會議廳竟無急救箱
不過Pierre就話，立法會會議廳同會議室入面都冇急救物品同儀器，所以佢要自己帶「急救包」返立法會開會至得喎！
Pierre話，立法會都有急救箱及九部心臟除顫器，直情「多到電死你」，不過喺經常出事嘅會議廳及會議室入面就冇。之前立會發生多次衝擊，佢發現出入口多數一係人多，一係被鎖，萬一有人受傷或暈倒，遠水根本救唔到近火，所以佢隨身自備急救包。
Pierre個急救包乜都有，包括血壓計、血含氧量計、聽筒、體溫計、消毒藥水及繃帶紗布，仲有聲稱可以畀貪靚女議員襯晒衫嘅彩色口罩，總值二千幾蚊。Pierre強調係自掏腰包買，冇申領開支o架！