政情：補選無望 彪尾會攞安慰獎

票王滿腹大計 謀東山再起

本報早前講過建制派對兩區補選讓路予工聯會已開綠燈，其中較有人氣嘅阿王出選毫無懸念，但阿彪之前出戰新界東得票不足二萬七千票，建制派內部考慮到勝算，經商討後覺得阿彪唔係最合適人選，所以暫定由阿王參選新界東係最保險嘅做法，至於九龍西就暫時未有人選。阿彪兩個月前輸咗選戰，依家分分鐘連補選都冇機會，唔通三十七歲就要政途玩完？不過，好多嘢都係焉知非福，皆因阿彪轉個頭又有隻好牌上喇。

話說勞顧會明年換屆，做咗六年勞方代表嘅吳秋北就安排阿彪參選，而阿彪最終不負眾望，在八人爭五個議席下，尋日成功以三百四十四票一嘗票王滋味，成功接棒。雖然勞顧會只係諮詢組織，職能同立法會無得比，但就啱晒主打勞工事務嘅阿彪，而佢當選後亦滿腹大計，例如爭取十七天勞工假、改善侍產假，以及勞顧會早前擱置咗嘅連續性合約四一八修訂等，擺出一副不認命嘅態度，話唔定專心做出成績，保持曝光同人氣，四年之後可以東山再起。

劉玉輝「開齋」砌低梁籌庭

尋日勞顧會改選，政府紀律部隊人員總工會主席劉玉輝亦砌低香港公務員工會聯合會總幹事梁籌庭，首次當選。作為首位參選並當選勞顧會嘅紀律部隊代表，劉玉輝話佔中同旺角騷亂後，市民同前線執法人員關係變差，唔少市民將怨氣發洩到執法人員身上，所以佢希望參選反映執法人員嘅困難，又講明唔會將政治立場帶入勞顧會，會將政治同勞工議題分開。