中環出更：聲討浪接浪 要漢奸黎滾出香港
反對壹傳媒黎智英（漢奸黎）嘅行動一浪接一浪！尋日朝早又有逾廿名示威者，去咗漢奸黎位於何文田嘅大宅外示威，高呼「反港獨」、「反黑金」及「肥佬黎滾出香港」等口號。總計由今年六月十日起，喺漢奸黎大宅同將軍澳壹傳媒大樓外嘅示威抗議活動，已經累積最少八十四次，其中自稱霸王國際集團員工及股民等苦主佔十次，正義聯盟三次，旅遊業界及其他團體人士約七十一次，估計總數好快就會超過一百次！
25人高呼「剷除毒傳媒」
昨早約十時，廿三名聲稱自發到場嘅男女，帶同兩名小童，一行廿五人抵達漢奸黎位於何文田嘅寓所門外。佢哋手持「排清淫禍黑毒，剷除毒傳媒，肥黎滾出香港」嘅大型橫額，高舉「反港獨」、「反黑金」及「肥佬黎滾出香港」嘅標語牌，高喊各類反黎口號，並透過大聲公播放《義勇軍進行曲》及《獅子山下》等歌曲。示威期間曾有警員到場了解情況，眾人逗留至約十一時和平離開。
卓妮