中環出更：梁德華食多咗 焗着西裝撐華服
電視劇演員着古裝就睇得多，尋日有唔少着古裝嘅後生仔出現喺黃大仙祠，原來係參加「穿華服四處去」活動。作為支持機構之一嘅香港道教聯合會主席梁德華一到場，就被孔教學院院長湯恩佳笑佢做乜着西裝出席。梁德華笑笑口解釋話，因為最近食多咗，又肥咗，冇啱着嘅道服喎！
梁德華話，本來都打算着道服出席，不過因為肥咗着唔到，雖然依家道服都有晒各種尺寸，即買即着，唔使特登訂造，不過佢四十八吋腰嘅身形，就只能訂造喇！着中山裝出席嘅湯恩佳就話，香港人成日着西裝、染頭髮，又用英文名，西化得好緊要，反而對華服就覺得好陌生，以為只係電影中見到嘅服裝，甚至以為華服係和服。佢好支持呢個活動，可以藉此傳承中華文化。
余曉樺冀復興中華文化
同場仲有黃大仙區議會主席李德康及民政事務局副局長許曉暉，許曉暉仲即場試着華服，顯出一身古典美。李德康就話，遲啲會建議區議會搞華服時裝設計比賽，等年輕人對華服及國家民族多啲認識喎！
主辦單位「漢服香港」一班年輕人就個個着晒華服出席。有份發起成立「漢服香港」嘅余曉樺話，細個睇電視覺得韓、日啲傳統服裝好靚，後來讀歷史先知係參考中國華夏服裝。佢覺得華服代表中國五千年文化底蘊，所以希望集結志同道合嘅人齊齊復興失落嘅文化。成員之一嘅吳文君就話，平時都會着漢服去派對，甚至返大學上堂添！
卓妮