本報早前報道過民建聯（民記）「兩老」葉國謙同譚耀宗仍然留喺立法會建制派嘅WhatsApp群組，據知譚耀宗喺換屆後就未出過聲，一直只讀不回；但係葉國謙就不時發表意見，尋日仲指指點點教班議員點發言，搞到包括民記黨友在內嘅議員都埋怨佢垂簾聽政。據了解，上屆做建制派班長嘅葉國謙仲係群組管理員，點解唔轉移管理員權限畀建制派新班長廖長江，抑或佢戀棧權力，想繼續喺幕後指揮呢？

建制派嘅群組喺今屆會期開始時有四十三人，除咗四十位現任建制派議員外，仲包括民記兩老同自稱「中間偏黃」嘅醫學界陳沛然（Pierre）。可能群組裏面太多建制派嘅部署，正所謂「非禮勿視」，Pierre喺今個月初已主動退出群組。不過民記「兩老」似乎唔當一回事，其中譚耀宗或者知道自己不在其位，留喺群組只係想得個「知」字，所以換屆後就未出過一句聲；但係前班長葉國謙就陰魂不散。

有建制派人士透露，自從本報踢爆「兩老」仲留喺群組內，葉國謙已經少咗出聲，但係尋日立法會辯論引用《權力及特權法》設立專責委員會調查廉政公署李寶蘭被取消署任執行處首長事件時，佢又忍唔住加把嘴教人點回應。據悉群組內其他人私底下都對葉國謙近乎垂簾聽政嘅做法有微言，連民記嘅黨友亦有所不滿，但佢哋目前敢怒不敢言，因為操控增減成員嘅群組管理員權限，仍然喺葉國謙手上。

其實WhatsApp群組嘅管理員可以指定其他人做管理員，而群組內嘅管理員人數係無上限。換言之，即使葉國謙想保留自己嘅群組管理員身份，佢亦可以同時指定現任班長廖長江同副班長陳克勤做新管理員。究竟係佢老人家唔熟新科技，唔識點樣轉移管理員權限，抑或佢有心攬權，繼續做幕後指揮呢？相信就得佢自己先至知道喇！

另外，據悉有個別建制派議會新丁喺群組內相當踴躍發言，包括曾經要求喺立法會大會提出反對港獨嘅動議，早前更提出休會辯論青年新政梁頌恆同游蕙禎嘅宣誓問題，但係建制中人都覺得呢啲建議過激而通通拒絕，兼要勞煩資深嘅成員去勸佢唔好搞咁多事添！