中環出更：陳曦齡姊妹分享開心大法
近年香港社會嘈吵不安，好多人都唔係咁開心，健靈慈善基金主席陳曦齡（Helen）覺得好心噏，決定同旅居日本嘅妺妹陳美齡及好友一齊發起「你我的香港」一系列講座，希望透過論壇形式探討香港人嘅困擾，請名家分享點樣做個快樂嘅香港人。
Helen話香港社會近年多咗好多負能量，好多人覺得唔開心，但係佢覺得香港係華人嘅天堂，所以早前同一班朋友及妹妹傾開，決定開壇探討快樂根源。講到點樣保持快樂心境，Helen笑言自己已有兩個優點，一個係勤力，一個係唔輕言放棄，如果經過一番努力，最終仍然未能如願，就要轉變諗法，話「呢樣嘢唔係你嘅」。佢又舉例，好似追女仔咁，如果用盡心思都係追唔到，咪諗「佢唔啱我囉！」總之，好多嘢如果求唔到，千祈唔好覺得係自己嘅失敗。
開論壇散播正能量
陳美齡就話自己長年喺外國居住，覺得香港係世界上最好嘅地方，好多香港人唔開心，其實係忽略咗香港嘅好處。現時論壇暫定每年開四場，第一場將於下月中登場，希望將正面訊息帶到每個家庭，帶動大家散播正能量，成為七百萬人嘅論壇。
同場仲有香港多項游泳紀錄保持者「香港蛙后」江忞懿，佢分享話游水係自細嘅夢想，喺成為香港代表隊參加奧運比賽前，曾經兩次錯失參加奧運嘅機會，更有長達六年嘅低潮期。不過喺呢段時間，佢領略到要接受成功嘅失敗，其實源於自己內心，要自己去尋找。
Helen老公兼心臟專科名醫謝德富都有到場，講到開心，日日幫人「救心」嘅佢，唔知有乜開心秘訣？佢笑笑口話，只要保持健康、喜悅及青春，做人就會開心。呢兩日佢因為美國新總統特朗普勝出而贏咗一餐飯，難怪佢開心笑晒喇！
卓妮