政情：想回應議員質詢 蘇錦樑講風涼話
因為議員宣誓風波，令立法會連續三次大會流會及休會，未完成宣誓嘅青年新政議員游蕙禎同梁頌恆今日會唔會再衝擊會議仲係未知之數，但係商務及經濟發展局局長蘇錦樑（Greg）尋晚喺一個活動上竟然抽水講風涼話喎。
等到眼光光
話說Greg蘇尋晚出席一個亮燈儀式，現場有一群女學生唱《月光光》，Greg蘇上台致詞時話呢首歌好好聽，喺度聽《月光光》好過喺立法會等到眼光光，事關立法會第四條議員質詢，佢連續三次大會都回應唔到，希望喺今日嘅大會可以答得到，唔好再流會。
喺呢個風頭火勢嘅時候，Greg蘇竟然仲喺度講埋呢啲風涼話。話時話，佢要答嗰條質詢係有關通訊局所進行嘅檢討，有冇制訂電視牌照中有關提供手語傳譯服務嘅條文嘅落實時間表，假如乜嘢實質嘢都答唔出，肯定畀班議員省到立立令就真，抽水抽得咁過癮吖嗱，因住抽着火水呀！