中環出更：密會三老鴿 漢奸黎疑攪局
全國人大常委會日前就《基本法》第一百零四條涉及宣誓嘅條文釋法，青年新政立法會議員游蕙禎及梁頌恆喺宣誓時披上及展示港獨旗幟及發表辱華言論或被踢出局外，其餘十二名喺誓詞中「加料」或擸道具嘅議員，亦可能因宣誓唔莊嚴而恐被「搣柴」。喺呢個時候，壹傳媒黎智英（漢奸黎）尋晚又密會民主黨（白鴿黨）創黨主席李柱銘（李漢奸）、該黨立法會前議員何俊仁（AV仁）及人稱「高達」嘅前議員李永達，四人密會兩小時，唔通又喺度諗計攪局？
李何去完反釋法遊行 專車送往黎家
李漢奸同AV仁昨日參加完法律界反釋法遊行，到晚上大約七時四十分，漢奸黎派司機用七人車載李漢奸、AV仁及高達，到漢奸黎位於何文田嘅寓所，三人進入漢奸黎寓所密會兩小時後，直至約九時四十分才離開。現場所見，當時高達面紅紅，可能係飲咗酒，之後佢哋再乘坐原車離開。佢哋四個喺立法會咁混亂嘅時候密會，難免令人覺得佢哋又再諗計攪局。
示威者撐霸王 上門斥黎滾出香港
雖然唔知佢哋搞乜嘢，但反漢奸黎嘅行動陸續有來。二十六名自稱係撐霸王集團關注組嘅人士喺尋日朝早十時三十分抵達漢奸黎寓所外，部分人士手持印有「打倒漢奸黎××賣國賊」、「千古罪人黎智英 黑金亂港禍港殃民」及「漢奸走狗黎智英 搞亂香港正衰人」等標語及橫額，又高舉五星旗及區旗，大叫「反中亂港！壹傳媒黎智英滾出香港！」等口號，佢哋逗留至十一時十分左右離開。及至下午二時三十分，示威者再折返抗議，到下午三時離開。
近期針對漢奸黎嘅示威行動不絕，自六月十日起計，至尋日已踏入一百五十二日，連同尋日嘅行動在內，到漢奸黎寓所及將軍澳壹傳媒大樓外示威嘅行動最少達八十次，當中自稱霸王國際集團員工及苦主佔十次、正義聯盟佔三次，旅遊業界及其他人士則有六十七次。
卓妮