政情：爭半數工程界選委 黎廣德大想頭
選舉特首嘅選舉委員會界別分組選舉提名期今日開始，公共專業聯盟政策召集人黎廣德帶頭組成十九人名單（圖），企圖搶攻工程界選委。佢講到明特首梁振英令香港社會撕裂、踐踏港人核心價值，一定唔會提名同投票畀佢，但就表明團隊會綑綁投票，之後亦會同其他界別嘅民主派選委傾吓支持邊個。
上屆八人名單僅兩當選
點講都好，黎廣德明顯好大想頭，上屆工程界三十席，佢牽頭嘅八人名單得兩個當選，仲有二十幾席都係建制工程師；上次慘敗之後，佢今次再籌組十九人名單，仲話要攞至少十五席，近乎係不可能的任務呀！佢就話唔少公務員工程師都不滿現屆政府施政，會盡力爭取呢批工程師支持，依家名單已經包括咗兩名水務署工程師，相信有助吸納公務員票源喎！
另外，有醫生組成「7人醫社連線」計劃先穩守本來五席之後，另外再爭取兩個新席位。召集人方津生話團隊有共同理念，要維護專業，為年輕醫生創造上流機會，佢哋已有多個醫學界重量級人馬，包括袁國勇同楊紫芝支持。但就話唔會用「ABC」（anyone but CY）作為口號，因為會予人「態度幼稚」嘅感覺，不過喺選擇投票意向時，就一定會考慮候選人嘅誠信、公信力同凝聚力，又形容自己的投票意向「已經好明顯」咁話喎！