政情：創科局唔見效 楊偉雄又搬偶像擋駕
創新及科技局成立將近一年，本港創新科技未見起色，局長楊偉雄尋日出席香港中華總商會講座，被問到政府點樣協助業界發展創新技術時就口啞啞，結果又搬出佢嘅偶像、蘋果公司已故創辦人Steve Jobs（喬布斯）嘅事迹當答咗。
楊偉雄上任之初就因為講：「我見過！我真係見過（喬布斯）」嘅威水史炫耀，遭網民瘋狂恥笑，但佢似乎一啲都唔介意，繼續將喬布斯掛喺口邊「沾光」。尋日有商界人士問起，能否參考美國，泊好車用手機搖一搖就畀到停車場費用，楊偉雄無啦啦引述喬布斯，話科技不應搞噱頭，而係要實用喎。另外有人話即使喺香港成功創新，但最後卻喺內地製造，認為本港未能完全享受成果。楊偉雄再舉喬布斯嘅蘋果公司，指蘋果手機大部分都係內地製造，強調值錢嘅係知識產權，最重要係新科技喺香港註冊。
不過呢，楊偉雄亦承認內地喺生產同落實創新方面比香港優勝，總結時更直指本港創新科技「無大陸唔得，有大陸又頭痕」。記者事後追問佢所指嘅頭痕係指邊一方面，佢就急急腳走人嘞！